KRITISK: Generalsekretær Rolf Kjøde i Normisjon er lite fornøgd med biskop Ingeborg Midttømme si linje. Biletet viser alteret og altertavla i Molde domkyrkje.
Foto: DM-arkiv
Ut av bispedømmerådet i protest
Leder i Møre bispedømmeråd Aleksander Aasen Knudsen søkjer om fritak for sitt kyrkjelege verv. Bakgrunnen er Mørebiskopen si innstramming av dåps- og nattvderdspraksisen.
JOHN SOLSVIK
På eit møte i Bispedømmerådet i dag fredag ber leiar Aleksander Aasen Knudsen om fritak frå oppgåva i det kyrkjelege rådet. Knudsen er medlem i Normisjon si forsamling i Molde, som held til i Rådhuset ved sida av Domkyrkja i Molde. Det siste året har Knudsen døypt eit barn i denne forsamlinga, noko som har falle biskop Ingeborg Midttømme tungt for hjarta.
No har ho gått ut med krav om innstramming av dåps- og nattverdspraksis i frie lutherske forsamlingar i bispedømmet. Ho krev at ein bedehusdåp må stadfestast på ei gudsteneste før barnet kan verta medlem i kyrkja, og ho skjerpar inn praksisen med bruk av lekfolk ved utdeling av nattverd.
Aleksander Aasen Knudsen stadfeestar at han går ut av Bispedømmerådet på grunn av biskopens reaksjonar på bedehusdåp. Ut over det vil han ikkje kommentera saka til DagenMagazinet.
— Dumt og dårleg signal
Generalsekretær Rolf Kjøde i Normisjon reagerer kraftig på Mørebiskopens utspel.
— Dette er eit dumt og dårleg signal frå ein biskop som vi ikkje kan leva med. Det er i strid med ideologien om den opne folkekyrkja og eit hinder for dei mest aktive innan kyrkja, seier Kjøde.
Han kallar Midttømmes utspel som eit gamal signal frå embetskyrkja som berre er eigna til å skapa større skilje mellom kristenfolket og presteskapet.
Kjøde vil ikkje ta omsyn til krava frå Mørebiskopen.
— Vi har eit tett forhold til Den norske kyrkja og ønskjer å bruka ordinerte prestar der det er naturleg, for ikkje å etablera eit eige kykjesamfunn. Ved dåp i våre forsamlingar innregistrerer vi den døypte i Den norske kyrkja, seier Kjøde.
— Får innskjerpinga til Mørebiskopen noko å seia for Normisjon sin praksis?
— Absdolutt ikkje. Vi har vald vår linje og køyrer vidare på den, seier Kjøde.
Forstår utspela
Preses og biskop i Agder og Telemark Olav Skjevesland forstår langt på veg utspela til sin bispekollega i Møre:
— Ein praksis der dåp og nattverd i stadig større grad skjer utanfor kyrkja kan bli nokså rotete. Vi kan sjå for oss at ein tek seg fridomar i slikt omfang at ein misser oversikten. Det er nemleg grenser for kor langt ein kan gå. Gud er ein ordens Gud, og det må skikkelege føringar til for å bli døypt og medlem i kyrkja, seier Skjevesland.
Agderbispen viser til at fri nattverd har vore tillate i Noreg sidan 1913, og at kristne har praktisert fri nattverd sidan.
— I prinsippet er nattverdforvaltinga fri, men fører det til splitting i den lokale venneflokken, bør ein kanskje vurdera denne praksisen —g, seier Skjevesland.
(04.09.2009 kl. 10:55)